簡單口訣記住東京地理

  海外生活     日本旅居

東京係一個又大又繁忙嘅城市，如果想喺短時間內掌握佢嘅地理，其實唔係咁難！喺 YouTube 上睇過一個影片，教大家用一個簡單易記嘅口訣：「東斜、西堵、南帝、北丐、中皇宮」。呢句說話係來自金庸《射雕英雄傳》嘅五大高手：東邪、西毒、南帝、北丐同中神通。

東斜：東京東邊的低地與傳統魅力

東京嘅東邊（例如台東區、墨田區）地勢低，靠近東京灣，有種向海傾斜嘅感覺，所以用「東斜」去記住。呢度係東京嘅老區，喺五六十年代，充滿咗各種細規模工廠。雖然宜家呢啲工廠逐步被淘汰，但仲可以見到手工藝作坊，例如做鞋、珠寶嘅地方。

東邊亦有兩個標誌性地標：淺草寺同晴空塔（Tokyo Skytree）。無論係參拜千年古寺定俾東京嘅高塔夜景震撼，呢啲都係遊客必去嘅景點。另外，東京迪士尼同成田機場其實喺更東嘅千葉縣，都屬於東京都會圈範圍。

西堵：繁忙核心與文化薈萃地

東京嘅西邊向來繁忙，因為三個副都心：新宿、澀谷、池袋都喺呢度集中。佢哋分別守護東京中央嘅皇宮，所以用「西堵」去記住。

• 新宿：係東京都政府嘅所在地，有高端寫字樓同夜生活熱點歌舞伎町。
• 澀谷：係潮流文化同科技嘅中心（谷歌日本總部喺呢度），亦係年輕人同時尚愛好者嘅天堂。
• 池袋：係動漫迷與中華美食嘅集中地，有不少華人聚居。

此外，西邊更有文藝青年的聖地，例如三鷹吉卜力美術館，係藝術家同設計師聚集嘅地方。咁多嘅人流同文化薈萃，當然會塞車啦，所以用「西堵」去記住。

南帝：富貴之地

東京南邊用「南帝」去記住，因為呢度係貴族同皇親國戚嘅首選居住地，例如港區同品川站。

• 港區：係東京塔所在地，亦有大量國際大使館，係日本同全球精英嘅集中地。
• 品川：係南邊進入東京嘅重要樞紐，新幹線亦喺呢度設站。
• 東京灣岸區則係高級住宅嘅集中地，奧運村亦喺呢度。

再往南就係神奈川縣嘅橫濱，呢度係歷史上日本開放國門嘅地方，亦係高端住宅區。

北丐：相對平民化嘅地區

北邊因為比較少高樓大廈，主要以低層住宅同物流業為主，所以用「北丐」去記住。但唔好睇少北邊，例如埼玉縣大宮係北部進入東京嘅交通樞紐，非常繁榮。而靠近東京嘅川口市，仲成為中國人聚居嘅熱點。房價較平，對啱啱到東京發展嘅人嚟講係一個好選擇。

中皇宮：東京嘅核心

東京嘅中心就係皇宮所在嘅千代田區，呢度唔單止係天皇嘅居所，仲係日本權力與經濟嘅核心。國會、法院、企業總部同銀座等高端商業區都集中喺呢度。