英國買車養車須知
英國生活 英國揸車
喺英國生活，駕駛成為日常生活中不可或缺的一部分。尤其喺冇咁完善嘅公共交通地區，擁有一部車能夠大大提升生活方便程度。然而，英國買車同養車涉及唔少法律規定同費用，以下係一些你需要知道嘅基本知識，幫助你更加輕鬆適應英國嘅駕駛生活。
買車養車法律要求
法律要求一：車輛年檢 MOT
MOT 係確保車輛可以安全上路嘅年檢，車輛註冊三年後就需要每年進行一次 MOT 檢驗。如果你買二手車，記得查清楚 MOT 嘅到期日，如果 MOT 就快過期，可以同賣家商量佢先做埋 MOT，咁樣可以節省唔少麻煩。
MOT 費用由車房決定，但政府有最高費用限制，周街都有車房可以做 MOT，最好揀間有信譽嘅，避免被不必要收費。
法律要求二：汽車保險
喺英國，汽車保險係法律規定必須購買嘅。有分為全保 Fully Comprehensive 同第三保 Third-Party Insurance，全保會提供更多保障。買保險時要注意，車保係跟人同跟車，所以唔可以將車借畀無保險嘅人使用。
如果你想借車畀朋友，有幾個方法可以做到：
- 喺車保中加上借車人嘅名字。
- 借車人擁有 Driving Other Cars (DOC) 嘅保險條款。
- 購買短期汽車保險（Short-term / Temporary Car Insurance）。
法律要求三：路稅
路稅 Road Tax / Vehicle Tax 係每年都需要繳交嘅費用，具體收費視乎車輛年份同款式。可以上 DVLA 官方網站查看詳情：Vehicle tax rates
汽車轉手之後，新車主必須重新繳交路稅，路稅唔會隨車轉讓。舊車主賣車之後，可以向 DVLA 申請取回未使用月份嘅路稅。即使路稅為 £0，都必須完成登記程序。你可以選擇每 6 個月或每 12 個月繳費，6 個月費用會比 12 個月略貴，大概貴10% 左右，亦可以設立銀行 Direct Debit 直接扣賬。
其他須知事項
排放標準
英國好多城市都實施咗 Clean Air Zone，以減低空氣污染。喺這些區域，某些車輛會被收取額外費用，例如倫敦市中心嘅 Congestion Charge，每日 £15，仲有低排放區 ULEZ，唔符合標準嘅車每日要支付 £12.5。
如果你考慮買車，建議選擇符合 ULEZ 標準嘅車，避免日後喺進出城市嘅時候產生額外費用。一般 2006 年以後嘅汽油車同 2016 年以後嘅柴油車大多符合標準。
汽車保養
法律只要求車輛每年通過 MOT 檢驗，但為咗確保車輛嘅安全同可靠性，日常保養亦非常重要。汽車保養服務叫做 Service，車廠會提供 Service Schedule，指出定期需要更換嘅零件同檢查項目。通常每 6 個月有一次簡單保養 Interim Service，一年做一次全面保養 Full Service。選擇有信譽嘅車房，可以確保保養質量。
在路上壞車點算好？
壞車、拖車保險 Breakdown Cover 並唔係法律要求，但係非常推薦購買。喺英國揸車，萬一行到半路架車壞咗，可以即刻得到道路救援、師傅出嚟整車、拖車服務，避免陷入尷尬嘅處境。Breakdown Cover 有唔同嘅計劃，包括是否包 Home Start、拖車距離限制、送返目的地等等，建議選擇適合自己需要嘅計劃。